الكاتب الكبير عاشق الإسكندرية
المبدع ناصر عبد الرحمن
وحالة عشق مع عروس البحر الأبيض المتوسط الإسكندرية
تناولها المبدع ناصر عبد الرحمن في الكثير من أعماله التليفزيونية والسينمائية نسج حروف كلماته من خيوط عشقه للإسكندرية ليسعدنا من خلال نهر كلماته الساحرة تسافر بالقلوب إلي بلد الخيال بطبيعتها الخلابة.
كلمات عشق في حب الإسكندرية
.الإسكندرية
أول الدنيا وآخرها
الحب المتجدد
والموج رزق الأيام
نهارها صياد
وليلها آيس
حبيبتي مفتاح الإسكندرية وسرها
أبوها إسكندراني
التاريخ شتا ياأبوسكندر
الصيف سراب القادمين اليها
ده خيال الكتاب فى أحلامها
داريل فوستر وتوفيق الحكيم
وإبراهيم عبد المجيد كتب لا أحد ينام في الإسكندرية
حبيبتي سمر
تبتسم فى عزة لمن يتجاهلها
وتضحك ضحكة العاشق لمن يهواها
من القلعة لأبوقير حكايات وتفاصيل
على صوت بحرها أتولد الفن
محمود مرسي من حضن الموج
إسكندرية من زمااان فارس
زي شعبان اللى بيقولوا عليه
أبويا بيسمى القهوة بورصة
كان على كوبري التاريخ بيحشش
وفي درب اللبان بيعطر حبيبته
بيحب خروب الدكتور ووشوش الأحلام في بير مسعود
علمني أمشي إليها
علمني أسمع البحر وأستمع
شوارع من السماء للبحر نازلة
حبيبتي حضن وشمسية
حبيبتي بتتكلم لغات
شعرها موج ٠٠٠٠٠ضحكتها شربات
وحواري ساكنها سيد درويش وخلخال حنان
وطعم التركى والبسطرمة كونة
وسمكة الغطاس شفا
قابلت مع البحر نصرة
حضن عروسة البحر
أتنيوس واليوناني وكفافيس
لما بتوحشني إسكندرية
ببعد عن الكوبري وعن الحدود وعن قتلة البحر وعن الكافيتريات
اللي أغتصبت البحر
ببعد عن الفنادق الوحوش القاتلة للموج
بدور على رملة البحر اللى غرقت
بدور على الشاطئ اللى سرق
بدور على حبيبتي اللى غرقت فى هدم
بدور على إسكندرية فى الأبراج اللى بتحارب الجمال
بدور على اسكندرية
يا شفيقة نادي وغني
ويا عبده الإسكندراني
صور يا شاهين البحر اللى غرق بطعم
وأسأل اسكندرية فين ؟
صور يا توفيق يا صالح سيد البلطي
وأرسم بالسيف يا ادهم يا وانلي
ومعاك محمد ناجى نقش الجدار فن
على عاشور يخبئ الإسكندرية في رسمه
صور اللى عايش حد يصور حد بيودعنا
حد يصور المركب المثقوب
حد يصور عزال من غير عروسة !
شبكة العروسة فلصوا والعريس متغرب في كونتير
الفن إسكندراني
اللي بيحب إسكندرية تمثال غرقان فى أبوقير
اللى بيحب إسكندرية مستخبي في النبي دنيال
اللى بيحب إسكندرية مجذوب على باب البوصيري
اللى بيحب إسكندرية بيدور على التروماى المقصوص
اللى باقي منك يا إسكندرية مستخبي فى بحري
سألت عنها محمود عبدالعزيز
وسألت عنها عمر الشريف وشكري سرحان وعادل ادهم
كلهم بصوا على الدنيا من الفنار
ضحكت هند رستم وغنا عماد عبد الحليم
اللى حلف أن راجع " أنا مهما خدتني المدن "
وزي غيره تاه فى المدن
حبيبتي خايف يجرالك اللى جري للماكس
بدور على عيونها السابحة وشعرها الغزير
بدور على صوتها الحلو المشروخ ولونك الحنة
بدور على إسكندرية
أستخبت خايفة من المغتصبين
خايفة من القتله
من اللى بيهدوا في جمالها من سنين
فينك يا بحر بعيد ليه
فينك يا رمل فينك يا حب
فينك يا اول فيلم وأول صورة
فينك يا عشق الفنان
عبد الوهاب إتعلم من درويش البحر
وأم كلثوم بتسقي من الموج صوتها
ومختار وسعيد وناجي
راغب والجزار رسمت بحرك
الكل عني يخبي
يوم ماهجرت المسرح
مسرح مسرح و العدد أربعين
والهدم العدد في الليمون
بيرم التونسي وكامب شيزار والريحاني وعبدالوهاب والعبد والسلام وال ليسيه ووووووووووو
الشاطبي بكا
يوم ما دفنوا تاريخه وبدلوه
بكا المسرح بعيون حبيبتي
حد شاف حبيبتي بعد البكا ؟!
حد شاف إسكندرية ؟
