خطفت مصممة الأزياء والسينوغرافيا "مارينا مجدي "الأنظار خلال تكريمها في الدورة السادسة عشرة من مهرجان الإسكندرية المسرحي الدولي "مسرح بلا إنتاج"، كواحدة من النماذج الشابة التي استطاعت أن تقدم فناً مختلفاً يمزج بين المسرح وفن الشارع بأزياء مصنوعة من خامات بسيطة التقت "مجلة الإسكندرية" بها على هامش التكريم، لتكشف عن كواليس التكريم ومشروعاتها المقبلة في الأكاديمية وأغرب المواقف التي تعرضت لها في الشارع السكندري.. وإلى نص الحوار:
*في البداية.. كيف استقبلت خبر تكريمك في المهرجان؟
بصراحة استغربت جداً أول ما قالولي، وقعدت أشكرهم كتير، أول حاجة بشكر المهرجان جداً جداً جداً، لأن الديكور دايماً بيبقى مظلوم شوية، هو دايماً ورا الكواليس والممثلين هم اللي بيتكرموا، لكن لفتة جميلة جداً من مهرجان إسكندرية إنهم يهتموا إنهم يكرموا الشباب خصوصاً في السينوغرافيا والحاجات اللي ليها علاقة بالصورة أكتر، وهي لفتة إدتني دفعة كبيرة أوي إن أنا أكمل وإن أنا ماشية صح وإن مفيش حد تعبه بيروح على الفاضي.
بعد تعيينك في المعهد.. هل تغيرت خطتك الفنية؟*
آه طبعاً، أنا اتعينت في المعهد فغيرت شوية توجهي، بدل ما كنت بنزل أعمل ميكب وكنت بقول للناس يا جماعة فيه فن شارع اعرفوه، المفروض دلوقتي مع الأكاديمية إن شاء الله هنعمل حملات جاية إن إحنا ننزل بشكل أكبر ومتوسع أكتر، فيه أفكار إن إحنا نعمل زي عربيات زمان، عربيات المسرح الصغيرة، لسه بناقش أفكار كتير معاهم.
ذكرتِ أنك تفكرين في محتوى تعليمي.. ما تفاصيله؟
فعلاً، عايزين نعمل مسابقات للأزياء للناس اللي بتعمل أزياء من الخامات البسيطة زي ما أنا بعمل، أنا بحب أشجعهم جداً وببقى عايزاهم طول الوقت يجربوا ويعملوا، لأن هو ده اللي بدأت بيه، أنا ماكنتش عارفة إن أنا بعرف أعمل أزياء من المسرح لكن لما دخلت الأكاديمية اتعلمت الحاجات دي، فإن شاء الله الفترة الجاية هعمل محتوى تعليمي إزاي أنا بدأت وإزاي الواحد يفكر إنه يعمل الحاجات دي أصلاً وما يخافش.
*ما النصيحة التي توجهيها لأي شاب خايف يبدأ؟*
أكتر حاجة كانت معطلاني سنين إن أنا خايفة أبدأ، وده اللي فرق معايا جداً لما بدأت، مجرد ما بدأت الموضوع بقى سهل، آه بغلط شوية بعمل حاجات مش أحسن حاجة بس مع الوقت بتطور جداً، فأنا بشجع أي حد عنده فكرة يجرب وما يخافش.
*ما أغرب رد فعل واجهك أثناء تقديمك لفن الشارع؟*
أغرب رد فعل إن الناس اتبسطت جداً، دي حاجة كانت غريبة بالنسبة لي، أنا فكرت إنهم هيخافوا ومش هيحبوا إنهم يتصوروا، بالعكس تماماً أنا لقيت ترحيب رهيب، الناس مبسوطة جداً بفكرة الفن، خصوصاً لما كنت بعمل شخصيات زي بينوكيو اللي هي كارتون مشهور، الناس الكبيرة في السن اللي هم أصلاً عارفين الكارتون وهم صغيرين كانوا متفاعلين معايا جداً.
ولما كنت بروح ناحية المسرح الروماني والمتحف الروماني كان كل الناس عمالة تبص اللي هو إيه ده الله أنا عايز أتصور معاكي، العرايس اللي بيتصوروا هناك عايزين يتصوروا معايا، ففكرة فن الشارع مرحب بيها جداً في الأماكن اللي فيها تجمع من الناس.
