مريم فايز تكتب... الشغف
الشغف هو العامل الرئيسي في استمرار أي علاقة سواء حب او صداقة
اوقات كتير لما بنقابل ناس جديدة بنكون عايزين نكلمهم و نتعرف عليهم و بنحاول نوصلهم بكل الطرق عشان نفتح مجال للحوار بينا و أول ما يبدأ الكلام بينا و بينهم بنبقى عايزين نكلمهم ال 24 ساعة في ال 24 ساعة و نقضي معاهم وقت طويل و نعرف عنهم كل حاجة... هو ده الشغف ...
و بيبدأ الشغف يزيد اكتر بشكل ملحوظ في كل مرة بنتكلم .
بس الشغف مش هيدوم كتير لانه كان مجرد مرحلة و انتهت و بدأت مرحلة جديدة و هي الملل و الزهق بعتبرها مرحلة إعصارية أيوه هي مرحلة إعصار و تقلب لأنها مرحلة مختلفة تماما ...
طب امتى و ازاي بنوصل للمرحلة دي
بنوصل للملل لما بيخلص كل الكلام ما طبيعي اتكلمنا في كل حاجة في حياتنا و الكلام خلص يبقى هنتكلم في ايه تاني !...
أو بنوصلها لما نلاقي البديل و تبدأ مرحلة شغف جديدة مع شخص جديد ..
يعني دي مرحلة أساسية و لازم نعدي عليها
هي مرحلة أساسية اه بس مش لازم تأثر علينا و مينفعش نتهاون بالمرحلة دي لانها بتدمر العلاقة تماما .
يبقى متخلصش الكلام في مرحلة البداية و خلي عندك استعداد لمرحلة الملل عشان تقدر تواجهه بدون يأس .
هي مرحلة طبيعية جدا بنوصلها يبقي لازم نختار أشخاص تكون قادرة تحافظ علي وجودنا في حياتهم .
الشخص الصح هو اللي يقدر يجدد الشغف في العلاقة من جديد ..
