سألونى انتى تمام ؟!
رديت ببسمه خارجه بالأحزان
و طافية النور
عجز اللسان عن وصف أى كلام
و أى شعور
لحظة ما سيبتك قلبى بات مكسور
و أنا كسري عمره ما بيداويه غيرك
من غيرك الأيام مبتعديش
يمكن شافونى الناس ثابتة و قادرة اعيش
بس الحياه واقفة ..
اقسملك أن دموعى ما بتنشف
حوليا مية تشجيع ب مية سقفة
مش شايفة غير لمتهم الأولى
يومها صحيت ع القصة مقفولة
و قالولى انه خلاص ..
مش هتدارى فى ظهرك
مش هترمى فى حضنك
و اتخبى فيه تانى
مش هصحى على صوتك
و لا هرجع اشكيلك من الدنيا احزانى
وصفولى يوم موتك بأنه ده يوم و هيعدى
لسة الحياه قصادى و لازم افوق
لحظة ما شوفت الناس بالقهوة بتعدى
وقف الزمان عندى فى نسمة شوق
و حنينى للماضى ..
فى خروجنا و هزارنا فى كلامنا ده العادى
او لما كنت تقولى حدوته
ساعة ما شوفتك ويا كل الناس
تحكى أن عندك أغلى بنوته ..
لسة فى تفاصيل كتيرة
محتاجة اوى تشاركنى فيها
لسة فى حكايات فى قلبى
نفسى احكيلك عليها
لسة عايزة اخد نصيحتك
فى اللى فات قبل اللى جاى
لسة عايزة ابات فى طيبتك
و ارجع القى أن انت حي
مش عايزة يبقى الكرسى فاضى
و المكان مفيهوش حياه
عايزة اصحى تانى الاقيك قصادى
انسى وجعى فى كل اه
رنة موبايلى ترن فاجأه
و يتكتب اسمك عليه
لو يوم تعبت بكلمة منك
جرحى يشفى من اللى فيه
عايزة أحس بأهتمامك
عايزة أخد رأيك كلامك
و بمشورتك ابنى سد
عايزة ريحتك بين هدومك
ابوس جبينك وقت نومك
صعب اتحمل بجد ..
أنا عايزة نتخانق و نشد تانى مع بعض
يوم لما نتصالح ننسى اللى كان حاصل
وسط المشاكل ما قدرنا يوم ع البُعد
بكلمة نصفى .. و تيجى وصلة ضحك متواصل
عايزة اقول بابا
الحقنى فى مشاكلى
عايزاك تزعقلي لو مرة اسيب اكلي
و اكدب و اقولك كلت
تهتم بدراستى و بلبسى و بشكلى
تراضينى مهما زعلت
عايزة اعيط
بس الوجع مكتوم
الجرح متخيط و القلب جبره عليه
لكنه متآلم من فُرقتك مصدوم
انا لسة عايزة أشرب من ايدك انت الشاى
محتاجة اشوفك بيا يوم فرحان
فايدتها ايه افرح ! طب قولى بس ازاى !!
كونك بعيد عنى ده قمة الحرمان
عايزاك تقولى تعالى نتمشى
انزل معاك و اسرح و انا ايدى ماسكة ايديك
استنى ليلى و ما اقدر اتعشى
غير لما تيجى انت و اللمة تكمل بيك
عايزاك تشجعنى على فروضى
مع بعض نستنى معاد الصوم
و اما احفظ القرآن او اوفى بوعودى
تيجى ابتسامه منك تسعدنى باقي اليوم ..
فى حياتى ما اتمنيت البس غير الأسود
كان حبى للالوان كما المعدوم
كان اغلى لون عندى فى دولابى ما بيبعد
لكن فى غيبتك لبسه اصعب كوم
مشتاقة ليك دلوقت
ايه معنى قيمة الوقت !
و انت بعيد عنى
مش لاقية ايد تمسح دمعة وجع منى
احساس يطمنى
انك حاسس بياا .. لسة بتسمعنى
كدبنى و ارجعلي قولى انه ده كان حلم
او كان كابوس و مخيف
قلبى قصاد الناس باين شجاع جداا
لكن حقيقته ضعيف ..
أنا لسة بسمع رنة المفتاح
و بحس خطواتك حوليا فى الشقة
لو حد قالى ابوكى مات او راح
ردى عليهم بيكون اكيد لأه
أنا ابويا عايش و معايا لسة مماتش
الوقت واقف عند لحظة مفاتش
و لا هسمح انه يفوت
هفضل لحد ما اموت عايشة على حسك
شايلة حروف اسمك و رفعاها
نفسى انى اكمل مشوارى على سيرتك
لكن دموع عينى مش مطوعاها
بتخونها كل ما تيجى حقيقة بوفاتك
سامعاك بتتكلم !
رغم اللى حوليا شاهدين على سكاتك
بنتك ظلمها زمانها ده و سرقك
و مسابش فرصة تتحامى فى طوقك
كنت الأمان ليها و كات سرك
و يارب تقدر توفى بحقوقك ..
حاسة بمرار وِحده
و الدنيا سجنانى
كل اللى جاى ساعات مفيهاش حياه و لا روح
ازاى هعيش عمرى و الفرقة كسرانى
فارقونى أغلى الناس و سابولى بس جروح
عايشة فى غُربة كبيرة و بعيدة
مش عارفة هوصل بيها حتى لفين
كل السنين الجاية دى جديدة
لكن عليا دخولها زي سكاكين
مش هعرف استناك فى رمضانها
و لا هعرف افرح كل داخلة عيد
كل البيوت مبسوطة سُكانها
لكن فى بيتنا ناقصة حد يزيد
مبقاش خلاص موجود ..
الضحكة أمرت حُزن بس يسود
و العين باقيلها ذكري من صورتك
مستنياك يا حبيبى يوم ما نعود
و لحد ما هيجي .. بتمنى ان دعايا يوصلك
أخبار متعلقة :