كتب: ميرنا محمد
أعلن اليوم المطرب رامي صبري إلغاء حفله بالإسكندرية المقرر إقامته يوم الخميس 28 سبتمبر الجاري .
وقدم رامي اعتذاره لجمهور الإسكندرية خاصة طلاب كلية آداب و أوضح سبب إلغاء الحفل في منشور عبر صفحته الشخصية على موقع التواصل الاجتماعي فيسبوك، قائلا :" بعتذر لجمهوري في الاسكندرية لعدم حضوري حفل كلية أداب اللي كان مقرر إقامته يوم الخميس الموافق 28/9/2023 لعدم إلتزام منظم الحفلات وليد منصور بالاتفاقات بيننا ".
وكان النجم رامي صبري قد أعلن مؤخرا عن إحياء حفلًا غنائيًا بمناسبة تخرج الدفعة الـ 81 من كلية الآداب بالإسكندرية المقرر إقامته فى فندق جولدن جويل حسبما أعلنت الشركة المنظمة .
و على صعيد آخر ، استعاد الفنان رامي صبري ذكريات رحلة صعوده حيث نشر صورة سابقة له و قارنها بصورة حديثة بعد تحقيق الشهرة و النجاح وعلق قائلا :" صوره من ٢٣ سنة تقريبا الفرق بينهم كبير جدًا في الصورة اللي فوق كنت بشتغل كورال مع الفنان الكبير محمد الحلو وكنت وقتها ببتدي اشتغل علشان افهم يعني ايه مسرح وجمهور وازاي اتعامل مع الناس في الشغل ".
وتابع :"كنت دايما عارف انها مرحلة تعليمية وهتمشي مش هقف عندها علشان كده مكانش عندي طموح فيها ،فضلت اشتغل كورال مع معظم النجوم ساعتها لحد ما لحنت لفضل شاكر وعامر منيب الله يرحمه وبعدين شيرين اول ما ابتدت ، وكل ده عارف ان هدفي لسه مجاش" .
واستكمل رامي حديثه موضحا :" الصورة اللي تحت بعد كل اللي فات والتعب والمجهود الكبير جدا ربنا كرمني كرم كبير جدا وميزني من وسط فنانين وخلاني اكون واحد من أهم نجوم العالم العربي ،الموضوع كله صدقني في الطموح لو انت بتحب نفسك ومأمن بنفسك وعندك الإصرار انك هتوصل لمكان انت مش فيه دلوقتي صدقني هتوصل بس تصدق نفسك ".
وأكد رامي أن الطموح و السعي هما السبيل الوحيد للنجاح مضيفا :"مفيش حاجه اسمها حظ دي كلمة محصلتش معايا ، مع حبي للموسيقى وطموحي وانا ماشي فيها كان في واحد معايا في نفس الصورتين وهو أخي وصديق العمر والموزع الموسيقي وعازف الكيبورد الاستاذ محمد سمير هو كمان طموحه كبير جدا وابتدي معايا في الصورة اللي فوق لحد ما بقي أحد أهم موسيقين مصر وبيلعب مزيكا مع أهم نجوم عالمنا العربي ولسه مكمل معايا من ٢٣ سنه لحد الان وهو مدير فرقتي الموسيقية ".
واختتم صبري حديثه قائلا :" عاوز اقول في الاخر طموحك وحبك لنفسك هيوصلك ماترميش شماعة الظروف على نفسك وتقول ظروفي وحظي وتدخل فى مود مش هيوصلك لحاجة ،هتوصل هتوصل صدقني اشتغل على نفسك اوي وحط في نفسك انك اهم واحد في العالم ولازم الناس كلها تعترف بيك ، وأول ما هتنجح كله هيجري وراك ويسقف لك الفرق بين الصورتين الطموح فقط صباح التفاؤل والنجاح " .
